Anbaa Aldelta انباء الدلتا
الكاتب الصحفى عاطف دعبس..يكتب
” تحديث بيانات إيه يامعالى الوزير؟ وشهادة فقر ليه فخامتك؟
•• فجأة وفى عز الأزمة وغيامة التضخم وإرتفاع الأسعار ونقص رغيف العيش المدعم وإستغاثات الغلابة من غول الأسواق
خرج علينا السيد المعالى وزير التموين الهمام د- على المصيلحى ليقرر إجراء عمليات مراجعة وبحث وتحديث لبطاقات الدعم التموينى وصرف الخبز – تقولش الناس ورثت!؟-
•• مراجعة بطاقات تموين إيه وتحديث بيانات ليه؟ هو ده وقته؟ يامعالى المعالى ؟؟ الناس مش ناقصة طوابير وحمل فلوس تصوير ومشاوير،
•• الغريب أن الرسالة التهديدية التى تصل للناس بتحديث البيانات وتقديم شهادات الفقر مرهونة بفترة محددة أخرها 25 مارس !!
والمطلوب من الموظف ورب الأسرة شهادة جديدة بالراتب وبحث إجتماعى وحاجة تخلى المواطن يكفر بالبلد والدنيا والكل كليلة!!
•• هو مش ده حرام برضه ؟ ولا عادى؟، مطلوب من المواطن الذهاب للتأمينات لطلب تقرير عن معاشه!؟ والمعاشات كلها هزيلة ومعروف متوسطها؟
وبعدين مش الحكومة إلكترونية وكل بيانتنا معروفه ومفتوحة على البحرى !؟
•• الموظف معروف راتبه والمعاشات معروف أخرها والغلابة السلك ضاربهم – وش وظهر –
لكن معالى الوزير له رأى وحكمة وفلسفة وشايف إن فيه مليونيرات طماعة وبتسرق الدعم الحكومى ؟؟
••• يا دكتور مصيلحى ربنا يصلح حالك،، خلى الناس فى حالها وإتركهم بما هم فيه ولا تدوس على جرح ولا تضعنا كالعرايا أمام أنفسنا !
الم يصلك نبأ البسطاء الذين يكحون ترابا بسبب الرواتب الهزيلة والمعاشات المترنحة مع حركة الأسعار وجشع التجار وسرقة أصحاب المخابز لقوت الشعب المطحون؟!
•• حضرتك مش حاسس بالناس مع كونك وزير شعبى وسياسى،، ولا متابع الأوجاع ولو شايف إننا تمام وإن الموظف وصاحب المعاش مرتاح ومبسوط ومش تعبان ولا من البؤساء فى الأرض!؟ يبقى لا مؤاخذة فيه حاجة غلط ولا بد من كل بد، من مراجعة هذه الأفكار التى تزيد الفقير فقرا والتعيس تعاسة
••• كنا ننتظر من فخامتك زيادة السلع على بطاقة التموين بمناسبة الأيام المباركة وشهر رمضان الكريم،، كما كان يحدث فى الماضى! وليس التفكير فى حذف الناس لأى سبب والسلام،
••• وتانى.. الناس مش حمل رسوم ولا إستخراج بيانات ولا حتى تصوير ورق !؟
كفاية حرام ، حرام ، حرام وربنا كبير..
•• ويامسهل
